Nafarroako Ikastolen Elkarteak JUUL 2026 sari-banaketa ekitaldia egin zuen atzo Zizur Nagusiko Kultur Etxean. Ikastoletako ikasleen boto gehien jaso zituzten euskal idazle eta ilustratzaileek euren aitortza jaso zuten bertan, irakurzaletasunaren sustapena eta euskal sorkuntza ardatz dituen egitasmo baten barruan. Ekitaldia Nafarroa Oinez antolatzen ari den ikastolarekin elkarlanean antolatu zen.
Aurtengo edizioak berriro erakutsi du JUUL egitasmoaren indarra. Duela 28 urte abiatu zenetik, Euskal Herriko 47 ikastolaren parte-hartzea lortu du, eta milaka ikasleren konpromisoa euskarazko irakurketarekin sustatzen jarraitzen du. Aurten, apirilaren 23ko bozketan, 14.817 boto eman ziren euskarazko liburuen kategorian eta 8.251 ilustratzaileen kategorian.
Ekitaldian izan ziren, besteak beste, Maite Mutuberria, Leire Bilbao, Nuria Figueras, Unai Elorriaga, Itxaso Martin, Nerea Loiola, Jasone Osoro, Jon Arretxe, Eider Eibar, Joseba Larratxe “Josevisky” eta Julen Ribas. Antolatzaileek bereziki eskertu zuten sortzaileen presentzia, ikasleen eta egileen arteko topagune bihurtu baitzen ekitaldia.
Janire Gracia Iñurritak, Nafarroako Ikastolen Elkarteko arduradun pedagogikoak, gogorarazi zuen JUUL ez dela sari-banaketa hutsa, ikastoletan urte osoan zehar egiten den irakurzaletasunaren sustapen-lanaren isla baizik. Azpimarratu zuenez, egitasmoaren helburua da ikasleen artean irakurzaletasuna sustatzea eta, aldi berean, sortzaile aktibo izatera bultzatzea.
Nafarroa Oinezen izenean, Eider Sagastibeltza Floresek nabarmendu zuen JUUL kanpainak bat egiten duela ikastolen hezkuntza-helburuekin, euskararen transmisioa eta euskaraz bizi, sortu eta mundura irekita jardungo duten gazteen heziketa sustatuz. Horretan, ezinbestekoa da euskal idazle eta ilustratzaileen lana, ikasleen hizkuntza-gaitasuna aberastu eta irudimena lantzeko tresna baliotsuak eskaintzen baitituzte.
Oier Sanjurjo Maték ere irakurzaletasuna sustatzearen garrantzia azpimarratu zuen gaur egungo testuinguruan. Pantailen eta berehalakotasunaren garaian, liburuek irudimena pizteko, mundua beste begi batzuekin ikusteko eta hazkunde pertsonala sustatzeko duten balioa nabarmendu zuen.
Bestalde, Josu Reparaz Leizak azaldu zuen Nafarroako Ikastolen Elkarteak urtero egiten diela aitortza berezia ikastoletako ikasleen boto gehien jasotzen dituzten sortzaileei. Aurtengo saridunek Celia Eslava artistak JUUL sarietarako berariaz sortutako artelanak jaso zituzten.
Ekitaldian protagonismo berezia izan zuten San Fermin ikastolako ikasleek. Haiek arduratu ziren sariak banatzeaz, eta amaieran, Zuriñe Larrainzar ikasleak sorpresa berezi bat prestatu zien saritutako hiru ilustratzaileei: bakoitzaren estilo artistikoa aztertu ondoren, marrazki bana egin eta oparitu zien.
